新聞中心

抽居屋終於「現代化」可上網交表?

2019 年 1 月 28 日
政府成日話要發展智慧城市,又整創科局又叫人搞初創企業,但係政府到而家派4000蚊都要人填表投遞,仲話搞網上申請要等18個月,大家都質疑到底政府有幾有誠意去推智慧城市。其實唔只4000蚊,而家政府仲有好多嘢都仲係要書面做,好似申請公屋居屋、學生資助同貸款等等。如今去到2019年,房委會終於醒起要研究一下搞網上申請喇!Jenny終於見到現代化嘅大門喇!

話說,今日房委會開會討論2019/20年度嘅機構計劃,就建議將公屋及資助出售單位,包括居屋、綠置居、白居二嘅申請推行電子化。即係話大家以後有機會網上申請就得,唔使Last Minute仆住去房委會交表喇!當然,到時個網頁負唔負荷到咁多人同時登入就係後話喇!大家或者可以入定「F5」補充裝,以備不時之需。

其實,房協早喺前年就開放咗網上申請資助出售房屋,畀大家申請屯門「翠鳴臺」同埋將軍澳「翠嶺峰」。Jenny以為房委會都會緊追其後,喺2018年嘅新居屋開放網上申請,結果是.沒.有.的!

而以香港人鍾意做Deadline Fighter嘅性格,次次居屋申請最後一日就會見到唔少人衝刺咁衝去房委會嗰客務中心,Jenny仲好有印象,上年4月嘅新居屋第一輪申請嘅最後一刻,真係有位阿生跑到入門口就跌親,堅係「仆」住嚟申請!日後有網上申請之後,Jenny估可能再見唔到呢個光景喇!

詳情新聞:#經濟通〈抽居屋終於「現代化」可上網交表?仆住去申請或成絕響〉